《我老婆是個會心靈感應的外星人》
我係文章中都久唔久會提起老婆，可能大家覺得我地平時都好恩愛好甜蜜，但我可以同你講，錯晒！
就係尋日，我同老婆去買日用品時，佢突然同我講：「我哋可唔可以再夾少少？」
我一頭霧水問：「咩唔夾啊？我覺得幾好喎！」
「唔係囉，頭先我叫你拎兩塊磚，你就真係拎兩塊磚，你唔覺得係問題咩？」
「吓？你叫我拎兩塊，我拎兩塊有咩問題，精準到我都搵唔到錯誤！」
「唔係囉，明明地下有四塊，我叫你拎兩塊你就拎兩塊，咁算點？係咪我叫你食多兩條菜你就真係食兩條先？」
「呃……如果你叫我食兩條，而我真係食兩條，咁都係無錯喎！」
「唔係囉，所以我話我地唔夾，你都唔知我諗咩嘅？」
「你講，我做，我明明跟住嚟做，但你要我感覺到你口講兩塊，但實際要四塊的話，咁以後我哋生活上好多事都會好亂喎，就好似你之前明明話要買百潔布咁，但你事實上係要『海綿』百潔布，如果唔係我發現問多句，就會買錯喇喎！」
「你跟我咁耐，你都唔知我係用海綿百潔布咩？我講錯你都可以get啱喎！」
「大佬啊，我真係無心靈感應喎，人之所以有口有耳，就係比人溝通，你講我聽，如果大家都心靈感應到的話，咁要口同耳做咩？同埋人真係無可能有心靈感應囉！」
「咁點解我同我阿媽講，佢明，我前男友們都明，係你特別唔明，仲要同我拗先？」
我心裡面鬧咗句，咁你同班心靈感應前男友們咪又係最終分手……不過我無講出口，只係依家寫出嚟。
認真講，我覺得聽咩做咩真係無關係，男人係講邏輯嘅，今日你講兩塊，你原來要四塊，今日你講要百潔布，原來係要海綿百潔布，到有日你真係想要兩塊百潔布之時，我放四塊海綿百潔布係你面前，你又會話我錯咁點算？
我留意咗好耐，老婆佢想我做佢肚入面條蟲，但我就係咁問到好仔細好清楚，佢就會好唔耐煩話，我樣樣野都要同你解釋咪好晒時間！你唔可以話頭醒尾，我唔講你已經做到我想做嘅事咩？
佢對我嘅不滿，我真係好無辜，我問，都係想知道你個邏輯係咩，咁清楚之後，我就會更清楚你嘅要求。
心靈感應，唔係無，而係當你同一個人同步得愈耐，愈清楚佢諗法，就愈會做到嘅事，心靈感應唔會憑空出現，你話有人做到，講真，有好多時候撞中咗你覺得好神奇，咁係個別事件，呢種憑運氣，憑過去經驗而做到嘅感應，有時候係唔會work。
點解唔正正經經發展一套兩個人有利嘅相處溝通呢？
當我好努力咁寫個program，兩塊就係兩塊，你搞亂我兩塊等於四塊，咁我好多底層邏輯都會亂咗，有bug的話，你個程序點run出嚟呢？
可惜，我一輪分析，都差唔多要佩服自己可以諗出一個咁有系統嘅做法之時，佢一句劈埋嚟：「你又話聽晒我話嘅？你跟我呢套就得！」
我……
「我咩我，係咪想離婚收場？」
我……
「你頭先咁大聲，講到好有道理咁，係咪覺得自己好叻，係咪想贏場交，輸個家？」
我……
我聽老婆話，唔出聲，開始心靈感應，但可能我功力唔夠，佢感覺唔到我心中鬧佢，仲好滿意咁，睇嚟我都係未掌握到，要練吓。
－－－－－－－－－－－－－－－－－－－－－
有興趣購買《弊傢伙，我女朋友有咗》的朋友，可以經以下連結購買：
Payme, FPS, Alipay連結：https://forms.gle/UEdH32PfVD2cp5nK6
掌鋪，可以使用Visa Master Card連結：https://maydreaming.boutir.com/i/WDnmnPAAA
舊作《那天，我出席了一個葬禮》《同學會重遇的那個人》《南極》亦可以同時購買，有興趣的可留言式inbox查詢
Search